ಹದಿನೈದು ವರುಷಗಳ ಉದ್ದಕ್ಕೂ ಅಡ್ರಿಯನ್ ಪಿಂಟೋ ಗಮನಿಸುತ್ತಲೇ ಇದ್ದರು: ದೇಶದ ಉದ್ದಗಲದಲ್ಲಿ ಹರಡಿರುವ ದ್ರಾಕ್ಷಿಯ ವೈನ್ ತಯಾರಿಸುವ ಘಟಕಗಳು ಟನ್ನುಗಟ್ಟಲೆ ದ್ರಾಕ್ಷಿಕಸ ಉತ್ಪಾದಿಸುವುದನ್ನು. ಆಗೆಲ್ಲ ಅವರಿಗೊಂದೇ ಯೋಚನೆ: ಈ ಕಸದಿಂದ ಏನಾದರೂ ಉಪಯುಕ್ತ ವಸ್ತು ಉತ್ಪಾದಿಸಬಹುದೇ?
ಸ್ಪಿರಿಟ್ ಉತ್ಪಾದಕಾ ಘಟಕ “ಪೆರ್ನೊಡ್ ರಿಕಾರ್ಡ್ ಇಂಡಿಯಾ”ದಲ್ಲಿ ಹಿರಿಯ ಮೆನೇಜರ್ ಆಗಿದ್ದ ಪಿಂಟೋ ಈ ಬಗ್ಗೆ ಸಂಶೋಧನೆ ಆರಂಭಿಸಿದ್ದು ೨೦೧೨ರಲ್ಲಿ. ಅದೊಂದು ದಿನ ದ್ರಾಕ್ಷಿಕಸದ ನಾರಿನಿಂದ ಕಾಗದ ತಯಾರಿಸಬಹುದು ಎಂದು ಅವರಿಗೆ ಹೊಳೆಯಿತು. ಒಂದು ಬ್ಲೆಂಡರ್ ಮತ್ತು ಬಲೆ ಬಳಸಿ, ತನ್ನ ಅಡುಗೆಕೋಣೆಯಲ್ಲಿ ದ್ರಾಕ್ಷಿಕಸದಿಂದ ಕಾಗದ ತಯಾರಿಸುವ ಪ್ರಯೋಗಕ್ಕಿಳಿದರು. ಮೊದಲ ಯತ್ನದಲ್ಲೇ ಯಶಸ್ಸು. “ಆ ಕಾಗದದ ಬಣ್ಣ ಮತ್ತು ರಚನೆ ಕಂಡು ಖುಷಿಯಾಯಿತು” ಎನ್ನುತ್ತಾರೆ ಪಿಂಟೋ.
ಅನಂತರ, ಈ ಕಿರುಉದ್ದಿಮೆ ಮುನ್ನಡೆಸಲಿಕ್ಕಾಗಿ ಅಹ್ಮದಾಬಾದಿನ ಇಂಡಿಯನ್ ಇನ್‍ಸ್ಟಿಟ್ಯೂಟ್ ಆಫ್ ಮೆನೇಜ್‍ಮೆಂಟಿನ ಒಂದು ಕೋರ್ಸಿಗೆ ಸೇರಿಕೊಂಡರು. ಹಾಗೆಯೇ ಮೇ ೨೦೧೬ರಲ್ಲಿ ಜಾಗತಿಕ ಬೌದ್ಧಿಕ ಸೊತ್ತಿನ ಸಂಸ್ಥೆಗೂ ಪೇಟೆಂಟಿಗಾಗಿ ಅರ್ಜಿ ಸಲ್ಲಿಕೆ; ದ್ರಾಕ್ಷಿಕಸದ ಕಾಗದ ಉತ್ಪಾದನೆಗಾಗಿ “ಗ್ರೀನ್ ಪೇಪರ್ ವರ್ಕ್ಸ್” ಸ್ಥಾಪನೆ.

ಸಸ್ಯಗಳನ್ನು ರೋಗ ಹಾಗೂ ಕೀಟಗಳಿಂದ ರಕ್ಷಿಸಲಿಕ್ಕಾಗಿ ಬಳಸುವ ಪೀಡೆನಾಶಕಗಳು ಮನುಷ್ಯರಿಗೆ ಮಾರಕವಾಗುತ್ತವೆ ಎಂಬುದಕ್ಕೆ ಹಲವು ನಿದರ್ಶನಗಳಿವೆ. ಉದಾಹರಣೆಗೆ ಎಂಡೋಸಲ್ಫಾನ್. ಆದರೆ, ಈ ಪೀಡೆನಾಶಕಗಳು ಸಸ್ಯಗಳಿಗೂ ಮಾರಕವಾಗುತ್ತವೆ ಎಂದೀಗ ಸ್ಪಷ್ಟವಾಗಿದೆ.
ಈ ಪೀಡೆನಾಶಕಗಳು ಸಸ್ಯಗಳಲ್ಲಿ ಕೆಲವು ರಾಸಾಯನಿಕಗಳು ಉತ್ಪಾದನೆಯಾಗಲು ಕಾರಣವಾಗುತ್ತವೆ. ಈ ರಾಸಾಯನಿಕಗಳು ಸಸ್ಯಗಳ ಪ್ರೊಟೀನುಗಳು, ಲಿಪಿಡುಗಳು, ಶರ್ಕರಪಿಷ್ಟಗಳು ಮತ್ತು ಡಿಎನ್ಎಗಳಿಗೂ ಹಾನಿ ಮಾಡುತ್ತವೆ ಎಂದು ತಿಳಿದು ಬಂದಿದೆ. ಇಮಿಡಾ ಕ್ಲೊಪ್ರಿಡ್ ಎಂಬ ಪೀಡೆನಾಶಕವು ಅಫಿಡುಗಳು ಮತ್ತು ಮಿಡತೆಗಳನ್ನು ಕೊಲ್ಲುತ್ತದೆ. ಆದರೆ ಅದು ಭತ್ತದ ಸಸಿಗಳು ಕಂದುಜಿಗಿಹುಳುವಿನ ದಾಳಿಗೆ ಸುಲಭವಾಗಿ ಬಲಿಯಾಗುವಂತೆ ಮಾಡುತ್ತದೆ.
ಪೀಡೆನಾಶಕಗಳ ಇಂತಹ ವಿಷಕಾರಿ ಪರಿಣಾಮಗಳನ್ನು ಕಡಿಮೆ ಮಾಡಬಲ್ಲ ನೈಸರ್ಗಿಕ ರಾಸಯನಿಕಗಳನ್ನು ವಿಜ್ನಾನಿಗಳು ಹುಡುಕುತ್ತಲೇ ಇದ್ದಾರೆ. ಅಮೃತಸರದ ಗುರು ನಾನಕ ದೇವ ವಿಶ್ವವಿದ್ಯಾಲಯದ ಸಂಶೋಧನಾ ತಂಡಕ್ಕೆ ಈ ಹುಡುಕಾಟದಲ್ಲಿ ಯಶಸ್ಸು ಸಿಕ್ಕಿದೆ. ಅದು ಎಪಿಬ್ರಾಸ್ಸಿನೊಲೈಡ್ (ಇಬಿಎಲ್) ಎಂಬ ಸಸ್ಯಮೂಲದ ಹಾರ್-ಮೋನನ್ನು (ಪ್ರಚೋದಕವನ್ನು) ಗುರುತಿಸಿದೆ. ಭತ್ತದ ಬೀಜಗಳನ್ನು ಕ್ಲೊರ್ ಪೈರಿಫೊಸ್ (ಕ್ಲೊರಿನ್-ಯುಕ್ತ ಪೀಡೆನಾಶಕ) ಇದರ ವಿಷಕಾರಿ ಪರಿಣಾಮಗಳಿಂದ ಇಬಿಎಲ್ ರಕ್ಷಿಸಬಲ್ಲದು.

ರಸಗುಲ್ಲಾ ಚಪ್ಪರಿಸಿದವರಿಗೇ ಗೊತ್ತು ಅದರ ಮಜಾ: ಬಾಯೊಳಗೆ ಹಾಕಿದೊಡನೆ ನಾಲಗೆಯ ಕಣಕಣವೂ ಜುಮ್ಮೆನಿಸುವ ಅನುಭವ.
ಇಂತಹ ರಸಗುಲ್ಲಾದ ಭೌಗೋಳಿಕ ಸೂಚಕದ ಹಕ್ಕುಸಾಧನೆ ಬಗ್ಗೆ ಈಗ ಎದ್ದಿದೆ ಗುಲ್ಲು. ಯಾಕೆಂದರೆ, ಇದರ ಭೌಗೋಳಿಕ ಸೂಚಕ (ಜಿಯಾಗ್ರಾಫಿಕಲ್ ಇಂಡಿಕೇಷನ್: ಜಿಐ) ನೀಡಬೇಕೆಂಬ ಅರ್ಜಿ ಬಂದಿರುವುದು ಒಡಿಶಾ (ಒರಿಸ್ಸಾ) ರಾಜ್ಯದಿಂದ. ದೇಶದ ಉದ್ದಗಲದಲ್ಲಿರುವ ಬಂಗಾಳಿ ಸಿಹಿತಿಂಡಿಗಳ ಅಂಗಡಿಗಳಿಂದ ರಸಗುಲ್ಲಾ ಖರೀದಿಸಿದವರೆಲ್ಲ “ಇದು ಬಂಗಾಳಿ ಸಿಹಿತಿಂಡಿ” ಎಂದು ನಂಬಿದ್ದರು.
ಆದರೆ ಆ ಗ್ರಹಿಕೆ ಸರಿಯಲ್ಲ. ರಸಗುಲ್ಲಾದ ತವರು ಬಂಗಾಳದ ಪಕ್ಕದ ಒಡಿಶಾ ರಾಜ್ಯದ ಭುವನೇಶ್ವರ ಮತ್ತು ಕಟಕ್ ನಗರಗಳ ನಡುವಿನ ಹೆದ್ದಾರಿಯ ಪಕ್ಕದ ಪುಟ್ಟ ಹಳ್ಳಿ ಪಹಲಾ. ಅಲ್ಲಿ ಅದರ ಹೆಸರು ಖೀರ್ ಮೋಹನಾ; ಅದನ್ನು ಪುರಿಯ ಜಗನ್ನಾಥ ದೇವರಿಗೆ ನೈವೇದ್ಯವಾಗಿ ೧೮ನೆಯ ಶತಮಾನದಿಂದಲೇ ಅರ್ಪಿಸಲಾಗುತ್ತಿದೆ. ಅಂದರೆ, ಕೊಲ್ಕತಾದ ನೊಬಿನ್ ಚಂದ್ರದಾಸ್ ರಸಗುಲ್ಲಾವನ್ನು ತಯಾರಿಸಿ ಮಾರಾಟ ಮಾಡತೊಡಗುವ ಒಂದು ಶತಮಾನ ಮುಂಚೆಯೇ ಒಡಿಶಾದಲ್ಲಿ ರಸಗುಲ್ಲಾ ಜನಪ್ರಿಯವಾಗಿತ್ತು.
ಒಡಿಶಾ ರಾಜ್ಯದ ಅತಿಸಣ್ಣ ಮತ್ತು ಮಧ್ಯಮ (ಗಾತ್ರದ) ಉದ್ದಿಮೆಗಳ ಇಲಾಖೆಯು ರಸಗುಲ್ಲಾದ ಹಕ್ಕುಸಾಧನೆ ಮಾಡಲು ಮುಂದಡಿ ಇಟ್ಟಾಗ ಇದೆಲ್ಲ ಗುಲ್ಲು ಶುರು. ಅನಂತರ ಮಾಧ್ಯಮ, ಪತ್ರಿಕೆ, ವೆಬ್ಸೈಟುಗಳಲ್ಲಿ ಹಾಗೂ ಟ್ವಿಟರಿನಲ್ಲಿ ಇಲಾಖೆಯ ಪರ ಹಾಗೂ ವಿರೋಧ ಅಭಿಪ್ರಾಯಗಳ ಸಾಲುಸಾಲು.

ಭೂಮಿಯ ಬಿಸಿಯೇರಿಕೆಯಿಂದ ಸಾಗರಜೀವಿಗಳ ಮೇಲೆ ಅಗಾಧ ಪರಿಣಾಮಗಳಾಗುತ್ತಿವೆ ಎಂದು ಬಹುದೇಶಗಳ ವಿಜ್ನಾನಿಗಳ ತಂಡ ಪತ್ತೆ ಮಾಡಿದೆ. ಆಸ್ಟ್ರೇಲಿಯಾ, ಬ್ರಿಟನ್, ಯುಎಸ್ಎ, ಡೆನ್ಮಾರ್ಕ್, ಸ್ಪೇಯ್ನ್ ಮತ್ತು ಕೆನಡಾ ದೇಶಗಳ ವಿಜ್ನಾನಿಗಳು ಇದರ ಸದಸ್ಯರು.
ಈ ತಂಡವು ಭೂಮಿಯ ಎಲ್ಲ ಸಾಗರಗಳಲ್ಲಿ ಸಂಶೋಧನೆ ನಡೆಸಿತು; ಆಸ್ಟ್ರೇಲಿಯಾದ ಪೂರ್ವ ಮತ್ತು ದಕ್ಷಿಣದ ಸಾಗರ ತೀರಗಳು, ಯುಎಸ್ಎ ದೇಶದ ಪೂರ್ವ ಮತ್ತು ಪಶ್ಚಿಮ ಸಾಗರ ತೀರಗಳು, ಯುರೋಪಿನ ಪಶ್ಚಿಮದ ಅಟ್ಲಾಂಟಿಕ್ ಸಾಗರ ಮತ್ತು ಮೆಡಿಟರೇನಿಯನ್ ಸಮುದ್ರಗಳಲ್ಲಿ ವಿಶೇಷ ಅಧ್ಯಯನ ಕೈಗೊಂಡಿತು.
ಈ ಸಾಗರಗಳಲ್ಲಿರುವ ಎಲ್ಲ ಜೀವಿಗಳಿಗೆ ಆಹಾರ ಒದಗಿಸುವುದು ಫೈಟೋಪ್ಲಾಂಕ್ಟನ್ ಎಂಬ ಸಸ್ಯಗಳು. ಭೂಮಿಯ ಮೇಲಣ ಸಸ್ಯಗಳಿಗೆ ಹೋಲಿಸಿದಾಗ, ಇವು ಈಗ ಸರಾಸರಿಯಾಗಿ ಆರು ದಿನ ಮುಂಚೆ ಅರಳುತ್ತಿವೆ. ಹಾಗೆಯೇ, ಹಂಗಾಮಿನಲ್ಲಿ ಮೀನಿನ ಮರಿಗಳು ಹನ್ನೊಂದು ದಿನ ಮುಂಚೆ ಮೊಟ್ಟೆಯೊಡೆದು ಹೊರಬರುತ್ತಿವೆ.
ಮೀನುಗಳು, ಷೆಲ್ ಮೀನುಗಳು, ಪ್ಲಾಂಕ್ಟನ್, ಕ್ರಸ್ಟೇಷಿಯನುಗಳು, ಮ್ಯಾನ್-ಗ್ರೂವುಗಳು, ಸಮುದ್ರಹುಲ್ಲುಗಳು ಇತ್ಯಾದಿ ಸಾಗರಜೀವಿಗಳು ತಮ್ಮ ನೆಲೆಯನ್ನು ಬದಲಾಯಿಸುತ್ತಿವೆ – ಭೂಮಿಯ ಪ್ರತಿಯೊಂದು ಡಿಗ್ರಿ ಸೆಲ್ಷಿಯಸ್ ಬಿಸಿಯೇರುವಿಕೆಗೆ ಪ್ರತಿಕ್ರಿಯೆಯಾಗಿ ಪ್ರತಿಯೊಂದು ದಶಕದಲ್ಲಿ ಸರಾಸರಿ ೭೨ ಕಿಮೀ ದೂರಕ್ಕೆ ತಮ್ಮ ನೆಲೆ ಬದಲಾಯಿಸುತ್ತಿವೆ.