ಆಟಿಕೆಗಳು ಬೇಕೆಂದು ಮಕ್ಕಳು ಹಟ ಮಾಡಿದಾಗ ತೆಗೆಸಿಕೊಡದಿರುವ ಹೆತ್ತವರುಂಟೇ? ಆದರೆ, ಮಕ್ಕಳಿಗೆ ಆಟಿಕೆ ತೆಗೆಸಿಕೊಟ್ಟೊಡನೆ ಹೆತ್ತವರ ಜವಾಬ್ದಾರಿ ಮುಗಿಯುವುದಿಲ್ಲ. ಆಟಿಕೆಗಳಿಂದ ಮಕ್ಕಳಿಗೆ ಅಪಾಯ ಆಗದಂತೆಯೂ ಹೆತ್ತವರು ಕಣ್ಣಿಟ್ಟು ಕಾಯಬೇಕಾಗುತ್ತದೆ.
ಏಕೆಂದರೆ ಆಟಿಕೆಗಳ ಬೃಹತ್ ವಹಿವಾಟಿನಲ್ಲಿ ಉತ್ಪಾದಕರ ಬೇಜವಾಬ್ದಾರಿಯ ಹಲವು ನಿದರ್ಶನಗಳಿವೆ. ಭಾರತದಲ್ಲಿ ಕೆಲವು ಕಂಪೆನಿಗಳ ಆಟಿಕೆಗಳ ವಾರ್ಷಿಕ ಮಾರಾಟ ತಲಾ ರೂಪಾಯಿ 3 - 4 ಕೋಟಿ ದಾಟಿದೆ! ಅದಲ್ಲದೆ ಲಿಯೋ, ಲಿಗೋ, ಬಾರ್ಬಿ ಇಂತಹ ಜಗತ್ಪ್ರಸಿದ್ಧ ಮಕ್ಕಳ ಆಟಿಕೆ ಕಂಪೆನಿಗಳೂ ಭಾರತದಲ್ಲಿ ಕೋಟಿಗಟ್ಟಲೆ ರೂಪಾಯಿ ವಾರ್ಷಿಕ ವಹಿವಾಟು ನಡೆಸುತ್ತಿವೆ. ಇಂತಹ ದಂಧೆಯಲ್ಲಿ ಉತ್ಪಾದಕರ ಲಾಭದಾಸೆಗೆ ಮಕ್ಕಳು ಬಲಿಯಾಗದಂತೆ ಹೆತ್ತವರೇ ಮುನ್ನೆಚ್ಚರಿಕೆ ವಹಿಸಬೇಕಾಗಿದೆ.
ಅಧ್ಯಯನದ ಫಲಿತಾಂಶ
ಭಾರತದಲ್ಲಿ ಮಕ್ಕಳ ಪ್ರಾಣಕ್ಕೇ ಕುತ್ತಾಗಬಲ್ಲ ಆಟಿಕೆಗಳ ಆಕಾರ, ಗಾತ್ರ, ಅವುಗಳ ತಯಾರಿಗೆ ಬಳಸಲಾಗುವ ದೋಷಪೂರ್ಣ ಅಥವಾ ವಿಷಯುಕ್ತ ವಸ್ತು/ ಪೈಂಟ್ ಇತ್ಯಾದಿಗಳ ಬಗ್ಗೆ ಒಂದು ಅಧ್ಯಯನ ನಡೆಸಲಾಯಿತು. ಆಟಿಕೆಗಳ ಮಾರಾಟಗಾರರು, ಹೆತ್ತವರು ಹಾಗೂ ಮಕ್ಕಳಿಂದ ಮಾಹಿತಿ ಸಂಗ್ರಹಿಸಿ ವಿಶ್ಲೇಷಿಸಲಾಯಿತು. ಅಂತಿಮವಾಗಿ ಆಟಿಕೆಗಳ ಸುರಕ್ಷಿತತೆ ಮತ್ತು ಗುಣಮಟ್ಟದ ಮಾನದಂಡ ನಿರ್ಧರಿಸಿ, ಅದನ್ನು ಕಾಯ್ದುಕೊಳ್ಳಲು ಮತ್ತು ಆಟಿಕೆಗಳಿಂದಾಗುವ ದುರ್ಘಟನೆಗಳ ಬಗ್ಗೆ ನಿರಂತರವಾಗಿ ಮಾಹಿತಿ ಸಂಗ್ರಹಿಸಲು ರಾಷ್ಟ್ರ ಮಟ್ಟದ ಅಧಿಕಾರ ಸಂಸ್ಥೆಯೊಂದನ್ನು ಸ್ಥಾಪಿಸಬೇಕೆಂದು ಅಧ್ಯಯನ ತಂಡವು ಶಿಫಾರಸ್ ಮಾಡಿದೆ.
ಈ ಅಧ್ಯಯನದಲ್ಲಿ ಗುರುತಿಸಲಾದ ಕೆಲವು ಅಪಾಯಕಾರಿ ಆಟಿಕೆಗಳ ವಿವರ ಹೀಗಿದೆ:
1) ಮರದ ರೈಲು, ವಿಮಾನ: ಇವುಗಳ ಮೊಳೆಗಳಿಂದ ಎಳೆಮಕ್ಕಳಿಗೆ ಗಾಯವಾದ್ದರಿಂದ ಟಿಟಿನಸ್ ರೋಗಕ್ಕೆ ಚಿಕಿತ್ಸೆ ನೀಡಬೇಕಾಯಿತು.
2) ಪ್ಲಾಸ್ಟಿಕ್ ಚುಚ್ಚುಪಿನ್ ಮತ್ತು ತೂತು ಫಲಕ: ಇದು ತೂತು ಫಲಕದಲ್ಲಿ ವಿಭಿನ್ನ ಚುಚ್ಚುಪಿನ್ಗಳನ್ನು ಚುಚ್ಚಿ, ವಿವಿಧ ಆಕೃತಿಗಳನ್ನು ರಚಿಸುವ ಆಟಿಕೆ. ಆ ಚುಚ್ಚುಪಿನ್ಗಳನ್ನು ಕಿತ್ತು ತೆಗೆಯುವಾಗ ಮಕ್ಕಳ ಚರ್ಮ, ಬೆರಳುಗಳು ಮತ್ತು ಉಗುರುಗಳಿಗೆ ಘಾಸಿಯಾಗುತ್ತದೆ.
3) ಆಟದ ಗನ್: ಸಾಬೂನಿನ ಗುಳ್ಳೆಗಳನ್ನು ಚಿಮ್ಮಿಸುವ ಆಟದ ಗನ್ನಿನಿಂದ ರಾಸಾಯನಿಕಗಳನ್ನು ಮಕ್ಕಳು ನೆಕ್ಕಿ ಅಥವಾ ನುಂಗಿ ಅನಾರೋಗ್ಯದಿಂದ ಬಾಧೆ ಪಡುತ್ತವೆ.
4) ಬ್ಯಾಟರಿ ಚಾಲಿತ ಆಟಿಕೆಗಳು: ಇವುಗಳ ಪುಟ್ಟ ಬ್ಯಾಟರಿಗಳು ಮಕ್ಕಳಿಗೆ ಕಾಣುವಂತಿದ್ದು, ಅವನ್ನು ಮಕ್ಕಳು ಸುಲಭವಾಗಿ ಕಿತ್ತು, ಬಾಯಿಯಿಂದ ಕಚ್ಚಿದಾಗ ಅಪಾಯವಾಗುತ್ತದೆ.
5) ಹಣ್ಣಿನ ಪರಿಮಳದ ಬಾಲ್: ಇದರ ಪರಿಮಳ ಹಾಗೂ ಆಕರ್ಷಕ ಬಣ್ಣವು ಮಕ್ಕಳು ಬಾಲ್ ನೆಕ್ಕಲು ಪ್ರೇರೇಪಿಸಿ, ಬಾಲ್ನ ವಿಷಭರಿತ ಪೈಂಟ್ ಮಕ್ಕಳ ಹೊಟ್ಟೆ ಸೇರಿ ಅನಾರೋಗ್ಯಕ್ಕೆ ಕಾರಣವಾಗುತ್ತದೆ.
ಆಟಿಕೆಗಳ ಅಪಾಯಗಳು:
ಮನೆಗೆ ತಂದ ಆಟಿಕೆಗಳೊಡನೆ ಮಕ್ಕಳು ತಕ್ಷಣವೇ ಆಡಲು ಶುರು ಮಾಡುತ್ತಾರೆ. ಅವು ಪುಟ್ಟ ಗಾತ್ರದ ಅಥವಾ ಹರಿತ ಭಾಗಗಳಿರುವ ಆಟಿಕೆಗಳಾಗಿದ್ದು, ಮಕ್ಕಳು ಬಾಯಿಗೆ ಹಾಕಿಕೊಂಡರೆ ಗಾಯವಾಗಿ ಚಿಕಿತ್ಸೆ ನೀಡಬೇಕಾಗುತ್ತದೆ. ಕೆಲವು ನಿರ್ದಿಷ್ಟ ಆಟಿಕೆಗಳ ಅಪಾಯಗಳು ಹೀಗಿವೆ:
ಗೊಂಬೆಗಳು: ಆಕರ್ಷಕ ತುಪ್ಪಳದ ಬೊಂಬೆಗಳು ಅಪಾಯರಹಿತ ಅನಿಸಬಹುದು. ಆದರೆ ಅವುಗಳ ಕಣ್ಣಿನ ಮಣಿಗಳು ಕಿತ್ತು ಬಂದಾಗ, ಮಕ್ಕಳು ಮಣಿ ನುಂಗಿ ಉಸಿರುಗಟ್ಟಿ ಅಪಾಯವಾದ ಪ್ರಕರಣಗಳಿವೆ. ಗೊಂಬೆಗಳ “ಪೀಂ ಪೀಂ” ಸಿಳ್ಳೆ ಗುಂಡಿಗಳೂ ಕಿತ್ತು ಬಂದಾಗ ಮಕ್ಕಳು ಅವನ್ನು ಬಾಯಿಗೆ ಹಾಕಿಕೊಂಡು ಫಜೀತಿಯಾದ ನಿದರ್ಶನಗಳೂ ಇವೆ.
ಆಟಿಕೆಗಳನ್ನು ಮಕ್ಕಳು ಬಾಯಿಗೆ ಹಾಕಿ ಕಚ್ಚಿದಾಗ ಪೈಂಟ್ ಕಳಚಿ ಬರುವಂತಿದ್ದರೆ ಅಪಾಯ. ಅದಕ್ಕಾಗಿ “ಸತು ಇರುವ ಪೈಂಟ್ಗಳನ್ನು ಆಟಿಕೆಗಳಿಗೆ ಹಚ್ಚಬಾರದು” ಎಂಬ ನಿಷೇಧ ವಿಧಿಸಲಾಗಿದೆ.
ಚೆಂಡು: ಪುಟಿಯುವ ಚೆಂಡುಗಳಿಂದ ಮಕ್ಕಳ ಪ್ರಾಣಹರಣವಾದೀತೆಂದರೆ ನಂಬುವಿರಾ? ಹದಿನೇಳು ವರುಷಗಳ ಅಂಕೆಸಂಖ್ಯೆಗಳ ಅನುಸಾರ ಯು.ಎಸ್.ಎ. ದೇಶದಲ್ಲಿ 40 ಮಕ್ಕಳ ಗಂಟಲಿನಲ್ಲಿ ಚೆಂಡು ಸಿಲುಕಿ ಉಸಿರುಗಟ್ಟಿ ಸತ್ತರು. ಅವರೆಲ್ಲ 6 ತಿಂಗಳಿನಿಂದ 12 ವರುಷ ನಡುವಣ ವಯಸ್ಸಿನವರು. ಅವರಲ್ಲಿ 36 ಮಕ್ಕಳು 5 ವರುಷ ಅಥವಾ ಕಡಿಮೆ ಪ್ರಾಯದವರು. ಈ ದುರ್ಘಟನೆಗಳಲ್ಲಿ ಬಾಯಿಗೆ ಹಾಕಿಕೊಂಡ ಚೆಂಡು ಗಂಟಲಿಗೆ ಜಾರಿ ವಾಯುನಾಳವನ್ನೇ ಮುಚ್ಚಿ ಬಿಟ್ಟಿತು. ಆ ಚೆಂಡುಗಳಲ್ಲಿ ಅತಿ ದೊಡ್ಡದರ ವ್ಯಾಸ ಒಂದೂವರೆ ಇಂಚುಗಳು. ಆದ್ದರಿಂದ, ವಸ್ತುಗಳನ್ನು ಬಾಯಿಗೆ ಹಾಕಿಕೊಳ್ಳುವ ಅಭ್ಯಾಸವಿರುವ ಮಕ್ಕಳಿಗೆ ಸಣ್ಣ ಚೆಂಡುಗಳು ಹಾಗೂ ದುಂಡಗಿನ ವಸ್ತುಗಳು ಕೈಗೆ ಸಿಗದಂತೆ ತೆಗೆದಿರಿಸಬೇಕು.
ಬೆಲೂನ್: ಗಾಳಿ ತುಂಬಿದ ಬೆಲೂನುಗಳು ನೋಡಲು ಚಂದವಾದರೂ ಪ್ರಾಣಕ್ಕೆ ಕುತ್ತಾಗಬಲ್ಲವು. ಮಕ್ಕಳು ಉಸಿರುಗಟ್ಟಿ ಸತ್ತ ಪ್ರಕರಣಗಳಲ್ಲಿ ಸಾವಿಗೆ ಮುಖ್ಯ ಕಾರಣ ಬೆಲೂನುಗಳು. ಗಾಳಿ ತುಂಬದ ಬೆಲೂನುಗಳು ಅಥವಾ ಬೆಲೂನಿನ ತುಂಡುಗಳು ಗಂಟಲಲ್ಲಿ ಸಿಕ್ಕಿಕೊಂಡು ನೂರಾರು ಮಕ್ಕಳು ಜೀವ ಕಳೆದುಕೊಂಡಿವೆ. ಇವರಲ್ಲಿ ಬಹುಪಾಲು ಮಕ್ಕಳು ಆರು ವರುಷಕ್ಕಿಂತ ಕಡಿಮೆ ಪ್ರಾಯದವರು.
ಹಲವು ದುರ್ಘಟನೆಗಳಲ್ಲಿ ಮಕ್ಕಳು ಬೆಲೂನಿಗೆ ಗಾಳಿಯೂದಲು ಪ್ರಯತ್ನಿಸುವಾಗ ಬೆಲೂನ್ ಬಾಯಿಯೊಳಗೆ ಸೆಳೆಯಲ್ಪಟ್ಟಿತು. ಬೆಲೂನ್ ಒಡೆದಾಗಲೂ ಹಿರಿಯರು ಅದನ್ನು ಮಕ್ಕಳ ಕೈಯಿಂದ ತೆಗೆದುಬಿಡಬೇಕು. ಇಲ್ಲವಾದರೆ, ಆ ಬೆಲೂನಿನ ತುಂಡಿನಲ್ಲಿ ಮಕ್ಕಳು ಗಾಳಿಯ ಗುಳ್ಳೆಯುಬ್ಬಿಸುವ ಆಟವಾಡುವಾಗ ಅದು ಸುಲಭವಾಗಿ ಗಂಟಲಿಗೆ ಸೆಳೆಯಲ್ಪಡುತ್ತದೆ. ಬೆಲೂನುಗಳನ್ನು ತಯಾರಿಸುವುದೇ ಒಳ ಸೇರಿದ ಗಾಳಿ ಹೊರಕ್ಕೆ ಬಾರದಂತೆ ತಡೆ ಹಿಡಿಯಲಿಕ್ಕಾಗಿ. ಗಂಟಲಿನಲ್ಲಿ ಸಿಕ್ಕಿಕೊಂಡಾಗಲೂ ಬೆಲೂನ್ ಗಾಳಿ ಸಂಚಾರ ಬಂದ್ ಮಾಡುತ್ತದೆ. ಆದ್ದರಿಂದ, ಮಕ್ಕಳು ಬೆಲೂನಿನಲ್ಲಿ ಆಡುತ್ತಿರುವಾಗ ಹಿರಿಯರು ಮಕ್ಕಳ ಮೇಲೆ ಕಣ್ಣಿಟ್ಟಿರಲೇ ಬೇಕು.
ಬೇಬಿ ವಾಕರ್: ಇದು ಆರು ಪುಟ್ಟ ಚಕ್ರಗಳಿರುವ ವೃತ್ತಾಕಾರದ ಗಾಡಿ. ಇದರ ಸೀಟಿನಲ್ಲಿ ಕುಳಿತು ಮಗು ಕಾಲುಗಳಿಂದ ತಳ್ಳಿದರೆ ಗಾಡಿ ಮುಂದೆ ಹೋಗುತ್ತದೆ. ಆದರೆ ಇದಕ್ಕೆ ಬ್ರೇಕ್ ಇಲ್ಲ! ಆದ್ದರಿಂದ, ಇದರಲ್ಲಿ ಕುಳಿತ ಮಗುವನ್ನು ಗಮನಿಸುತ್ತಲೇ ಇರಬೇಕು. ಇಲ್ಲವಾದರೆ, ಬಿರುಸಿನಿಂದ ಓಡುವ ಬೇಬಿ ವಾಕರ್ ಅಡ್ಡಬಿದ್ದು ಅಥವಾ ಮೆಟ್ಟಲುಗಳಿಂದ ಉರುಳಿ ಬಿದ್ದು ಮಗುವಿನ ಕೈಕಾಲು ಮುರಿದೀತು; ಪ್ರಾಣವೂ ಹೋದೀತು. ಇಂತಹ ಅಪಘಾತಗಳ ಸಂಖ್ಯೆ ಹೆಚ್ಚುತ್ತಿದೆ. ಒಂದೇ ವರುಷದಲ್ಲಿ ಬೇಬಿ ವಾಕರಿನಿಂದಾಗ 27,800 ಅಪಘಾತಗಳಿಗೆ ಆಸ್ಪತ್ರೆಗಳ ಎಮರ್ಜೆನ್ಸಿ ಘಟಕಗಳಲ್ಲಿ ಚಿಕಿತ್ಸೆ ನೀಡಬೇಕಾಯಿತು. ಇವುಗಳಲ್ಲಿ ಬಹುಪಾಲು ಅಪಘಾತಗಳಿಗೆ ಕಾರಣ ಬೇಬಿ ವಾಕರ್ ಮೆಟ್ಟಲಿನಿಂದ ಉರುಳಿ ಬಿದ್ದುದು.
ತೊಟ್ಟಿಲಲ್ಲಿ ತೂಗುವ ಆಟಿಕೆ: ಎಳೆಮಕ್ಕಳಿಗೆ ಐದು ತಿಂಗಳು ವಯಸ್ಸಾದಾಗ ಕೈಗಳು ಮತ್ತು ಮಂಡಿಗಳನ್ನೂರಿ ಮೈ ಎತ್ತಲು ಶುರು ಮಾಡುತ್ತವೆ. ಆ ಸಮಯದಲ್ಲಿ ಎಳೆಮಕ್ಕಳ ಕೈಗೆ ಈ ತೂಗು ಆಟಿಕೆಗಳು ಎಟಕುತ್ತವೆ. ಎಳೆಮಗು ಅವುಗಳ ದಾರ ಜಗ್ಗಿದಾಗ ನೇತಾಡುವ ದಾರ ಅದರ ಕೊರಳಿಗೆ ಉರುಳಾದ ಪ್ರಕರಣಗಳಿವೆ. ಎಳೆಮಗುವಿಗೆ ದಾರದಿಂದ ಬಿಡಿಸಿಕೊಳ್ಳಲಿಕ್ಕೂ ಆಗದೆ, ಸಮತೋಲನದಿಂದ ನಿಲ್ಲಲಿಕ್ಕೂ ಆಗದೆ, ಉಸಿರುಗಟ್ಟಿ ಸಾಯುತ್ತದೆ.
ಟಿ.ವಿ. ಗಾಡಿ: ಪುಟ್ಟ ಗಾಲಿಗಳನ್ನು ಜೋಡಿಸಿದ ಟೆಲಿವಿಷನ್ ಗಾಡಿಗಳು ಮಗುಚಿಬಿದ್ದು ಮಕ್ಕಳಿಗೆ ಮೂಳೆಮುರಿತವಾಗಿದೆ. ಪ್ರತಿ ವರುಷವೂ ಇಂತಹ ದುರ್ಘಟನೆಗಳು ವರದಿಯಾಗುತ್ತಿವೆ. ಹಲವು ಪ್ರಕರಣಗಳಲ್ಲಿ ಮಕ್ಕಳು ಸತ್ತೇ ಹೋದವು. ಇವೆಲ್ಲ ದುರ್ಘಟನೆಗಳಲ್ಲೂ ಗಾಡಿಯ ಮೇಲ್ಭಾಗದ ಹಲಗೆಯಲ್ಲಿ ಟೆಲಿವಿಷನ್ ಇರಿಸಲಾಗಿತ್ತು.
ತಂತಿ/ ರಿಬ್ಬನ್ ಇರುವ ಆಟಿಕೆ: ಈ ಆಟಿಕೆಗಳ ತಂತಿ/ ರಿಬ್ಬನ್ ಮಕ್ಕಳ ಕೊರಳಿಗೆ ಸುತ್ತಿಕೊಂಡು ಸಾವುಗಳಿಗೆ ಕಾರಣವಾಗಿದೆ. ಐದು ವರುಷಗಳ ಅವಧಿಯಲ್ಲಿ ಮಕ್ಕಳ ಕುತ್ತಿಗೆಗೆ ಚೈನಿನಂತೆ ಹಾಕಿದ ಆಟಿಕೆಗಳು, ನೆಕ್ಲೇಸ್ಗಳು ಮತ್ತು ಪುಟ್ಟ ಗಿಟಾರ್-ಗಳು ಒಟ್ಟು 27 ಮಕ್ಕಳ ಪ್ರಾಣ ಬಲಿ ತೆಗೆದುಕೊಂಡವು. ಈ ಹಲವು ಪ್ರಕರಣಗಳಲ್ಲಿ ಆಟಿಕೆಯ ತಂತಿ ಅಥವಾ ರಿಬ್ಬನ್ ಯಾವುದೋ ಕೊಂಡಿಗೆ (ತೊಟ್ಟಿಲಿನ ಮೂಲೆ ಗೂಟಕ್ಕೆ, ಕುರ್ಚಿ ಅಥವಾ ಬಾಗಿಲಿನ ಹಿಡಿಕೆಗೆ) ಸಿಲುಕಿ ಮಕ್ಕಳ ಕಂಠಕ್ಕೆ ಬಿಗಿದು ಉಸಿರುಗಟ್ಟಿಸಿತು.
ದೊಡ್ಡ ಬಕೆಟ್: ಇದು ಆಟಿಕೆಯಲ್ಲ; ಆದರೆ ಅನೇಕ ಪ್ರಕರಣಗಳಲ್ಲಿ ಮಕ್ಕಳ ಮೃತ್ಯುಕೂಪವಾಗಿ ಪರಿಣಮಿಸಿದೆ. ಯು.ಎಸ್.ಎ. ದೇಶವೊಂದರಲ್ಲೇ ಪ್ರತಿ ವರುಷವೂ 50 ಎಳೆಮಕ್ಕಳು ದೊಡ್ಡ ಬಕೆಟಿನಲ್ಲಿ ತುಂಬಿಟ್ಟ ನೀರು ಅಥವಾ ದ್ರಾವಣದಲ್ಲಿ ಮುಳುಗಿ ಸಾಯುತ್ತಿವೆ. ಇಂತಹ ಬಹುಪಾಲು ಮಕ್ಕಳು 8ರಿಂದ 14 ತಿಂಗಳು ವಯಸ್ಸಿನವು.
ಐದು ಗ್ಯಾಲನ್ಗಳಿಗಿಂತ ಜಾಸ್ತಿ ಗಾತ್ರದ ಬಕೆಟ್ಗಳು ಎಳೆಮಗುವಿನ ಸೊಂಟದ ಎತ್ತರಕ್ಕಿರುತ್ತವೆ. ಇದರಲ್ಲಿ ಒಂದಡಿ ನೀರಿದ್ದರೂ ಒಳಗೆ ಬಿದ್ದ ಮಗುವಿನ ತಲೆ ಮುಳುಗಿ ಮಗು ಸಾಯುತ್ತದೆ. ನೆಲದಲ್ಲಿ ಹೊಟ್ಟೆಯೆಳೆದು ಸಾಗುವ, ಎದ್ದು ನಿಲ್ಲಲು ಹವಣಿಸುವ ಮಕ್ಕಳು ಬಕೆಟಿನ ಅಂಚು ಹಿಡಿದು ನಿಂತು, ನೀರು ತುಂಬಿದ ಬಕೆಟಿನೊಳಗೆ ಕುತೂಹಲದಿಂದ ಇಣುಕುತ್ತಿರುವಾಗ ಆಯತಪ್ಪಿ ಬಕೆಟಿನೊಳಗೆ ಬಿದ್ದರೆ ಸುಲಭವಾಗಿ ಬಲಿಯಾಗುತ್ತವೆ. ಮಗುವಿನೊಂದಿಗೆ ಇದ್ದವರು ಅರೆನಿಮಿಷ ಟೆಲಿಫೋನಿನಲ್ಲಿ ಮಾತಾಡಿ ಬರುವಷ್ಟರಲ್ಲಿ ಅನಾಹುತ ಆಗಿರುತ್ತದೆ!
ಹೊಸ ಬೆಳವಣಿಗೆ
ಈಗಂತೂ ಮಕ್ಕಳಿಗೆ ವಿಡಿಯೋ ಗೇಮ್ಗಳ ಗೀಳು ಹೆಚ್ಚುತ್ತಿದೆ. ಆಧುನಿಕ ತಂತ್ರಜ್ನಾನವನ್ನು ಮಕ್ಕಳ ಆಟಿಕೆಗಳ ರಚನೆಗೆ ಅಳವಡಿಸಿದಾಗಲೇ ವಿಡಿಯೋ ಗೇಮ್ಗಳ ಹಾವಳಿ ಶುರುವಾಯಿತು. ವಿಧವಿಧದ ವಿಡಿಯೋ ಗೇಮ್ಗಳ ಹೊಸತನ ಸಹಜವಾಗಿಯೇ ಮಕ್ಕಳನ್ನು ಆಕರ್ಷಿಸುತ್ತದೆ. ಇತ್ತೀಚೆಗಿನ ಅಧ್ಯಯನದ ಪ್ರಕಾರ ಯುರೋಪಿನಲ್ಲಿ ಹಾಗೂ ಅಮೇರಿಕದಲ್ಲಿ ಬಹುತೇಕ ಎಲ್ಲ ಮಕ್ಕಳ ಕೈಯಲ್ಲಿಯೂ ವಿಡಿಯೋ ಗೇಮ್ ಆಟಿಕೆಗಳಿವೆ. ಭಾರತದಲ್ಲಿಯೂ ಹೆಚ್ಚೆಚ್ಚು ಮಕ್ಕಳಿಗೆ ಹೆತ್ತವರು ವಿಡಿಯೋ ಗೇಮ್ ಆಟಿಕೆಗಳನ್ನು ಕೊಡುತ್ತಿದ್ದಾರೆ.
ಈ ಹೊಸ ಬೆಳವಣಿಗೆಯ ಅಪಾಯಗಳು ಪತ್ರಿಕೆ/ ಟಿವಿ ಚಾನೆಲುಗಳಲ್ಲಿ ಪ್ರತಿ ವಾರವೂ ವರದಿಯಾಗುತ್ತಿವೆ. ಅನೇಕ ವಿಡಿಯೋ ಗೇಮ್ಗಳು ಹಿಂಸೆ ಅಥವಾ ಯುದ್ಧ ಒಳಗೊಂಡ ಆಟಗಳೇ ಆಗಿವೆ. ಆದ್ದರಿಂದ ಮಕ್ಕಳ ಎಳೆ ಮನಸ್ಸಿನ ಮೇಲೆ ಈ ಆಟಗಳ ಪರಿಣಾಮ ಏನೆಂದು ಸುಲಭವಾಗಿ ತಿಳಿಯಬಹುದು. ಕೆಲವು ಸಂಶೋಧನಾ ವರದಿಗಳ ಪ್ರಕಾರ ಇಂತಹ ಹಿಂಸಾಚಾರದ ಆಟಗಳ ಗೀಳು ಹಿಡಿದ ಮಕ್ಕಳು ತಮ್ಮ ವರ್ತನೆಯಲ್ಲಿ ವ್ಯಗ್ರರಾಗುವ ಸಂಭವ ಜಾಸ್ತಿ. ಆದ್ದರಿಂದ ಅಂತಹ ವಿಡಿಯೋ ಗೇಮುಗಳಿಂದ ಮಕ್ಕಳನ್ನು ದೂರವಿಡುವುದು ಹೆತ್ತವರ ಜವಾಬ್ದಾರಿ.
ಆಟಿಕೆಗಳಿಂದ ಅಪಾಯ ಆಗದಿರಲು …
ಆಟಿಕೆಗಳಿಂದ ಮಕ್ಕಳಿಗೆ ಅಪಾಯ ಆಗದಿರಲು ಹೆತ್ತವರು ಆಟಿಕೆ ಖರೀದಿಸುವಾಗಲೇ ಎಚ್ಚರ ವಹಿಸಬೇಕು. ಈ ನಿಟ್ಟಿನಲ್ಲಿ ಕೆಲವು ಸೂಚನೆಗಳು ಇಲ್ಲಿವೆ:
1)ಆಟಿಕೆ ಪ್ಯಾಕ್ ಆಗಿದ್ದರೆ, ಖರೀದಿಸುವ ಮುನ್ನ ಪ್ಯಾಕ್ ತೆರೆದು, ಸುರಕ್ಷಿತತೆ ಬಗ್ಗೆ ಪರೀಕ್ಷಿಸಿ - ಇದರಿಂದ ಏನಾದರೂ ಅಪಾಯ ಇದೆಯೇ? ಎಂದು. ಆಟಿಕೆಯ ಪ್ಯಾಕೇಜಿನಲ್ಲಿ ಮುದ್ರಿಸಿದ ನಿರ್ದೇಶನಗಳನ್ನು ಸರಿಯಾಗಿ ಓದಿರಿ.
2)ಆಟಿಕೆಯಲ್ಲಿ ಸುಲಭವಾಗಿ ಕಿತ್ತು ಬರುವ ಸಣ್ಣ ಭಾಗಗಳು ಇವೆಯೇ? ಎಂದು ಗಮನಿಸಿ. ಇದ್ದರೆ, ಮಕ್ಕಳು ಅವನ್ನು ನುಂಗಿ ಉಸಿರುಗಟ್ಟೀತು.
3)ಆಟಿಕೆಯಲ್ಲಿ ಹರಿತವಾದ ಅಥವಾ ಮೊನಚಾದ ಭಾಗಗಳು ಇವೆಯೇ? ಎಂದು ಪರಿಶೀಲಿಸಿ.
4)ಉದ್ದವಾದ ಹಗ್ಗ/ ತಂತಿ/ ರಿಬ್ಬನ್ ಆಟಿಕೆಯಲ್ಲಿ ಇದೆಯೇ? ಅದು ಮಕ್ಕಳ ಕೊರಳಿಗೆ ಉರುಳಾದೀತು.
5)ಹತ್ತಿ ತುಂಬಿದ ಗೊಂಬೆಗಳ ಹೊಲಿಗೆ ಭದ್ರವಾಗಿದೆಯೇ? ಎಂದು ನೋಡಿರಿ. ಆ ಹೊಲಿಗೆ ಬಿಚ್ಚಿ ಹತ್ತಿ ಹೊರಬಂದರೆ ಮಕ್ಕಳು ನುಂಗಬಹುದು.
6)ನಿಮ್ಮ ಮಗುವಿನ ವಯಸ್ಸು 3 ವರುಷಗಳಿಗಿಂತ ಕಡಿಮೆಯಿದ್ದರೆ, ಖರೀದಿಸುವ ಆಟಿಕೆ ಎಳೆಮಗುವಿಗೆ ಸುರಕ್ಷಿತವೇ? ಎಂದು ಪರೀಕ್ಷಿಸಿ. ಯಾಕೆಂದರೆ ಹಿರಿಯ ಮಕ್ಕಳಿಗೆ ಸುರಕ್ಷಿತವಾದ ಆಟಿಕೆ ಕಿರಿಯ ಮಕ್ಕಳಿಗೆ ಅಪಾಯ ತಂದೀತು.
7)ವಿಡಿಯೋ ಗೇಮ್ ಆಟಿಕೆಯಲ್ಲಿ ಹಿಂಸೆಯ ಅಥವಾ ಧಾಳಿಯ ಆಟ ಇದೆಯೇ? ಎಂದು ನೋಡಿ.
8)ಹೊಸ ಆಟಿಕೆ ಮನೆಗೆ ತಂದ ನಂತರ ಅದರೊಂದಿಗೆ ಸುರಕ್ಷಿತವಾಗಿ ಆಡುವುದನ್ನು ಮಕ್ಕಳಿಗೆ ಕಲಿಸಿರಿ.
9)ಆಟಿಕೆಯಲ್ಲಿ ಬಿರುಕುಗಳು ಮೂಡಿವೆಯೇ? ಆಟಿಕೆ ಸರಿಯಾಗಿ ಕೆಲಸ ಮಾಡುತ್ತಿದೆಯೇ? ಎಂದು ಆಗಾಗ ಪರೀಕ್ಷಿಸಿರಿ. 10)ಆಟಿಕೆ ಹಾಳಾದರೆ ಅಥವಾ ರಿಪೇರಿ ಮಾಡಲಾಗದಿದ್ದರೆ ಅದನ್ನು ಕಿತ್ತೆಸೆಯಿರಿ.
ಆಟಿಕೆಗಳು ಮಕ್ಕಳ ದೈಹಿಕ ಹಾಗೂ ಮಾನಸಿಕ ಬೆಳವಣಿಗೆಗೆ ಖಂಡಿತ ಸಹಕಾರಿ. ಹಾಗಂತ ಮುಗ್ಧ ಮಕ್ಕಳಿಗೆ ಅಪಾಯಕಾರಿ ಆಟಿಕೆ ನೀಡಿದರೆ ಆಟದ ಬದಲು ಕಾಟವಾದೀತು. ನೆನಪಿರಲಿ, ಮಕ್ಕಳಿಗೆ ಹೆತ್ತವರು ಅಪಾಯರಹಿತ ಆಟಿಕೆ ನೀಡುವುದು ಪ್ರೀತಿ ನೀಡುವಷ್ಟೇ ಮುಖ್ಯ ಕರ್ತವ್ಯ.